Plaistigh aon úsáide

Má mhonaraíonn nó má sholáthraíonn tú earraí plaisteacha aon úsáide, ba cheart duit a bheith ar an eolas faoi rialacha an Aontais darb aidhm laghdú a dhéanamh ar thionchar táirgí plaisteacha áirithe ar an gcomhshaol.

Táirgí coiscthe

Tá cosc ar tháirgí ar earraí plaisteacha aon úsáide iad a mheastar a bhfuil roghanna malartacha inbhuanaithe ann ina leith atá ar fáil go héasca ar phraghas réasúnta.

Earraí plaisteacha a bhfuil cosc orthu san Aontas (amhail ó 2021):

• cipíní baitín cadáis*
• sceanra (foirc, sceana, spúnóga, cipíní itheacháin)
• plátaí
• soip*
• meascthóirí dí
• cipíní balúin
• coimeádáin bhia agus dí atá déanta as polaistiréin bhorrtha
• cupáin dí atá déanta as polaistiréin bhorrtha
• gach táirge atá déanta as plaisteach ocsó-indíghrádaithe.

Ceanglais maidir le lipéadú

Éilíonn táirgí áirithe marcanna soiléire caighdeánaithe chun tomhaltóirí a chur ar an eolas faoin méid seo a leanas:

• roghanna iomchuí bainistithe dramhaíola,
• plaisteach a bheith sa táirge,
• tionchar diúltach an bhruscair ar an gcomhshaol.

Seo a leanas na táirgí a bhfuil lipéid ag teastáil ina leith:

• pillíní sláintíocha, súitíní agus forchuradóirí súitíní
• ceirtíní taise
• táirgí tobac a bhfuil scagairí ag gabháil leo
• cupáin le haghaidh deochanna

Soláthraíonn an tAontas Eorpach na sonraíochtaí comhchuibhithe marcála agus na picteagraim ina veicteoirí is féidir leat a íoslódáil en . Ní mór duit a chinntiú go bhfuil an lipéad priontáilte go díreach ar an táirge nó ar a phacáistíocht, é sa mhéid ceart, sa dath ceart agus san áit cheart mar atá leagtha amach sna sonraíochtaí AE en .

[Gailearaí íomhánna]

Ceanglais maidir le dearadh

I gcás coimeádáin dí suas le 3 lítear, ní mór caipíní agus claibíní a fhanann ceangailte díobh a bheith acu le linn na húsáide atá beartaithe don táirge.

Ina theannta sin, féadfaidh tíortha an Aontais bearta éagsúla a fhorchur chun a chinntiú go mbeidh 25% ar a laghad de phlaisteach athchúrsáilte (buidéil PET amháin) i ngach buidéal dí plaisteach aon úsáide ar an meán faoi 2025 agus 30% (gach buidéal) faoi 2030.

Freagracht leathnaithe táirgeora

Is é is freagracht leathnaithe táirgeora (EPR) ann nach mór duit, mar chuideachta, an dramhaíl a bhainistiú agus an bruscar a ghlanadh arb iad do tháirgí is cúis leis. Ina measc sin tá costais a chumhdach le haghaidh bailiú dramhaíola, athchúrsáil agus feachtais feasachta poiblí chun truailliú plaisteach a laghdú.

Cé na táirgí a chumhdaítear?

Tá feidhm ag rialacha EPR maidir le cuideachtaí a chuireann na táirgí plaisteacha aon úsáide seo a leanas ar an margadh:

• coimeádáin bhia
• paicéid agus cumhdaigh
• coimeádáin dí
• cupáin le haghaidh deochanna
• málaí siopadóireachta plaisteacha éadroma
• ceirtíní taise
• balúin
• táirgí tobac a bhfuil scagairí ag gabháil leo

Is féidir leat do chuid oibleagáidí EPR a chomhlíonadh trí pháirt a ghlacadh i scéim náisiúnta EPR. D’fhéadfadh costais agus riachtanais shonracha na scéime a bheith éagsúil i dtíortha éagsúla den Aontas.

Feasacht tomhaltóirí agus spriocanna laghdaithe dramhaíola

Tá oibleagáidí ar gach tír san Aontas tomhaltóirí a chur ar an eolas agus iompar freagrach tomhaltóirí a dhreasú, tomhaltas coimeádán bia agus cupán aon úsáide a laghdú, agus spriocanna bailithe ar leithligh a bhaint amach le haghaidh buidéal suas le 3 lítear. Is faoi gach tír atá sé a chinneadh cén dóigh leis sin a dhéanamh, ach is minic a bhíonn oibleagáidí áirithe ar ghnólachtaí i gceist le rialacha náisiúnta.

D’fhéadfadh sé go gciallódh sin nach mór duit roghanna malartacha inbhuanaithe ar phlaistigh aon úsáide a chur ar fáil do do thomhaltóirí nó iad a chur ar an eolas faoin tionchar a bhíonn ag modhanna míchuí diúscartha dramhaíola.

Féach freisin

Forléargas en lena ngabhann naisc chuig reachtaíocht an Aontais agus chuig reachtaíocht thánaisteach maidir le plaistigh aon úsáide.

Is féidir rochtain a fháil ar eolas náisiúnta thíos.