Il-plastik li jintuża darba biss

Jekk timmanifattura jew tforni oġġetti tal-plastik li jintużaw darba biss, għandek tkun taf bir-regoli tal-UE li għandhom l-għan li jnaqqsu l-impatt ta’ ċerti prodotti tal-plastik fuq l-ambjent.

Il-prodotti pprojbiti

Huma pprojbiti l-prodotti li jkunu oġġetti tal-plastik li jintużaw darba biss li fil-każ tagħhom ikun meqjus li jkunu jeżistu alternattivi sostenibbli disponibbli faċilment u bi prezz konvenjenti.

L-oġġetti tal-plastik ipprojbiti fl-UE (mill-2021 ’l hawn):

• l-istikek tal-cotton buds*
• il-pożati (frieket, skieken, mgħaref, chopsticks)
• il-platti
• l-istraws*
• il-ħawwada tax-xorb
• l-istikek tal-bżieżaq
• il-kontenituri tal-ikel u tax-xorb magħmulin mill-polistiren espandut
• it-tazez tax-xorb magħmulin mill-polistiren espandut
• il-prodotti kollha magħmulin mill-plastik ossodegradabbli.

Ir-rekwiżiti tat-tikkettar

Ċerti prodotti jirrikjedu mmarkar ċar u standardizzat biex il-konsumaturi jkunu infurmati dwar:

• għażliet xierqa għall-immaniġġjar tal-iskart,
• il-preżenza tal-plastiks fil-prodott,
• l-impatt ambjentali negattiv tar-rimi taż-żibel.

Il-prodotti li jirrikjedu t-tikketti huma:

• l-assorbenti sanitarji (pads), it-tampuni, u l-applikaturi tat-tampuni
• il-wet wipes
• il-prodotti tat-tabakk bil-filtri
• it-tazez tax-xorb

L-UE tipprovdi l-ispeċifikazzjonijiet armonizzati ta’ mmarkar u l-pittogrammi vettorizzati li tista’ tniżżel en . Trid tiżgura li t-tikketta tiġi stampata direttament fuq il-prodott jew fuq l-imballaġġ tiegħu, fid-daqs, il-lewn, u l-pożizzjoni korretti kif deskritt fl-ispeċifikazzjonijiet tal-UE en .

[Images gallery]

Ir-rekwiżiti tad-disinn

Il-kontenituri tax-xorb li jesgħu sa 3 litri jrid ikollhom tappijiet u għotjien li jibqgħu mwaħħlin waqt l-użu previst tal-prodott.

Barra minn hekk, il-pajjiżi tal-UE jistgħu jimponu diversi miżuri biex jiżguraw li fis-suq tagħhom, il-fliexken tax-xorb tal-plastik kollha li jintużaw darba biss, sal-2030 bħala medja jkun fihom mill-inqas 25% plastik riċiklat (fil-każ tal-fliexken tal-PET biss) sal-2025 u 30% (għall-fliexken kollha).

Ir-responsabbiltà estiża tal-produttur

Ir-responsabbiltà estiża tal-produttur (EPR, extended producer responsibility) tfisser li bħala kumpanija trid timmaniġġja l-iskart u tnaddaf l-iskart iġġenerat meta l-prodotti tiegħek jintremew barra. Dan jinkludi li tkopri l-ispejjeż għall-ġbir tal-iskart, għar-riċiklaġġ, u għal kampanji ta’ sensibilizzazzjoni pubblika biex jitnaqqas it-tniġġis mill-plastik.

Liema prodotti huma koperti?

Ir-regoli tal-EPR japplikaw għall-kumpaniji li jintroduċu fis-suq dawn il-prodotti tal-plastik li jintużaw darba biss:

• il-kontenituri tal-ikel
• il-pakketti u t-tgeżwir
• il-kontenituri tax-xorb
• it-tazez tax-xorb
• il-basktijiet tal-plastik ħfief
• il-wet wipes
• il-bżieżaq
• il-prodotti tat-tabakk bil-filtri

Tista’ tissodisfa l-obbligi tal-EPR tiegħek billi tingħaqad ma’ skema nazzjonali tal-EPR. L-ispejjeż u r-rekwiżiti speċifiċi tal-iskema jistgħu jvarjaw bejn pajjiż u ieħor tal-UE.

Is-sensibilizzazzjoni tal-konsumaturi u l-miri għat-tnaqqis tal-iskart

Il-pajjiżi kollha tal-UE għandhom obbligi li jinfurmaw lill-konsumaturi u jinċentivaw imġiba responsabbli min-naħa tal-konsumatur, inaqqsu l-konsum ta’ kontenituri tal-ikel u tazez li jintużaw darba biss, u jilħqu l-miri tal-ġbir separat għall-fliexken li jesgħu sa 3 litri. Huwa f’idejn kull pajjiż biex jiddeċiedi kif isir dan, iżda r-regoli nazzjonali spiss jinvolvu ċerti obbligi għan-negozji.

Dan jista’ jfisser li jkollok toffri lill-konsumaturi tiegħek alternattivi sostenibbli għall-plastik li jintuża darba biss jew tinfurmahom dwar l-impatt tar-rimi mhux xieraq tal-iskart.

Ara wkoll

Ħarsa ġenerali en , b’links, għal-leġiżlazzjoni tal-UE u għal-leġiżlazzjoni sekondarja dwar il-plastik li jintuża darba biss.

Ikseb aċċess għall-informazzjoni nazzjonali hawn taħt.