Ħaddiema transfruntieri
Jekk taħdem f'pajjiż tal-UE iżda tgħix f'pajjiż ieħor u tmur lura d-dar kuljum, jew tal-anqas darba fil-ġimgħa, inti titqies bħala ħaddiem transfruntier.
Kun żgur li tiċċekkja:
- x'impatt se jkollu fuq is-sigurtà soċjali tiegħek il-fatt li taħdem f'pajjiż tal-UE u tgħix f'ieħor:
- fejn tkun trid tħallas it-taxxi fil-perjodu li fih tgħix barra pajjiżek
Ara wkoll:
Id-dritt tiegħek li tgħix f'pajjiż ieħor tal-UE
Ir-reġistrazzjoni tal-karozza għall-ħaddiema transfruntieri
Skambju u rikonoxximent tal-liċenzji tas-sewqan fl-UE
Il-liġijiet ta' liema pajjiż japplikaw?
Fil-ħajja ta' kuljum, inti suġġett għal-liġijet taż-żewġ pajjiżi.
Il-liġijiet fejn taħdem ikopru:
- l-impjieg u t-taxxi fuq l-introjtu
- il-biċċa l-kbira tad-drittijiet tas-sigurtà soċjali
Il-liġijiet fejn tgħix ikopru:
- it-taxxi fuq il-proprjetà u l-biċċa l-kbir tat-taxxi l-oħra
- formalitajiet ta' residenza
Storja bħala eżempju
Kun ċert li ma titlifx flus jekk ħdimt f'pajjiż ieħor
Evelien, min-Netherlands, ħadmet il-Ġermanja waqt li baqgħet tgħix fin-Netherlands għal 10 snin. Matul dak iż-żmien, iddeċidiet li tagħmel skema ta' pensjoni privata fil-Ġermanja u kisbet bonus ta' qligħ għall-pensjoni mill-awtoritajiet Ġermaniżi.
Meta rtirat, l-awtoritajiet Ġermaniżi talbuha tħallas lura l-bonusijiet kollha tal-qligħ għall-pensjoni li tawha matul l-aħħar 10 snin. Qalulha li dan ġara minħabba li hi waqfet tħallas it-taxxi fil-Ġermanja. Iżda hekk kif Eveline waqfet taħdem il-Ġermanja, kellha tħallas it-taxxi fil-pajjiż ta' residenza tagħha, in-Netherlands.
Evelien tellgħet il-każ quddiem il-qrati Ġermaniżi. Qablu li, bħala ħaddiema li tgħix f'pajjiż u taħdem f'ieħor, kienet intitolata għall-bonus, li jgħodd bħala benefiċċju supplimentari. Evelien ma kellhiex tħallas lura l-bonus.
Jekk tiġi rifjutat benefiċċji supplimentari mogħtija lill-ħaddiema fil-pajjiż fejn taħdem, ikkuntattja konsulent Ewropew għall-impjiegi jew is-servizzi ta' informazzjoni u assistenza tagħna.
Storja bħala eżempju
Benefiċċji li int intitolat għalihom fil-pajjiż fejn taħdem
Rosita tgħix l-Italja mar-raġel tagħha u mat-3 uliedha, iżda taħdem Franza. Applikat għal abbonament bi prezz imnaqqas tal-ferrovija għall-familji numerużi, iżda ma tawhuliex peress li la hi u lanqas uliedha ma jgħixu Franza.
Rosita għandha tinsisti u, jekk ikun hemm bżonn, titlob l-għajnuna mid-diversi servizzi ta' assistenza tal-UE. Il-ħaddiema kollha tal-UE b'familji numerużi (f'ħafna mill-pajjiżi dan ifisser 3 itfal jew iktar) huma intitolati għal ivvjaġġar imraħħas tal-ferrovija fejn jaħdmu mill-jum meta jibdew jaħdmu — jekk dan it-tip ta' roħs ikun jeżisti għaċ-ċittadini ta' dak il-pajjiż.
Kont tal-bank għall-ħlas tas-salarju
Jista' jagħti l-każ li l-impjegatur tiegħek ikun iridek tiftaħ kont tal-bank fil-pajjiż tal-impjieg tiegħek biex iħallas is-salarju tiegħek. Madankollu, jekk is-salarju tiegħek jitħallas bl-ewro, l-impjegatur tiegħek huwa legalment obbligat jiddepożitah fil-kont tal-għażla tiegħek, sakemm ikun fl-UE.
Tista’ tirċievi s-salarju tiegħek fi kwalunkwe kont bankarju bbażat fl-UE billi tuża l-IBAN tiegħek, u t-tariffa tat-trasferiment ma tistax taqbeż it-tariffa imposta għat-trasferimenti domestiċi.