Ir-regoli tal-kompetizzjoni fl-UE
L-UE għandha regoli stretti li jipproteġu l-kompetizzjoni ħielsa. Skont dawn ir-regoli, ċerti prattiki huma pprojbiti.
Jekk tikser ir-regoli tal-kompetizzjoni tal-UE, tista’ tiġi mmultat sa 10% tal-fatturat globali annwali tiegħek. F’xi pajjiżi tal-UE, maniġers individwali ta’ impriżi li jiksru r-regoli jistgħu jiffaċċjaw penali serji, inkluż il-ħabs.
Ir-regoli tal-kompetizzjoni tal-UE japplikaw direttament fil-pajjiżi kollha tal-UE - il-qrati f’pajjiżek jimxu magħhom. Dawn ir-regoli japplikaw mhux biss għan-negozji iżda wkoll għall-organizzazzjonijiet kollha involuti f’attività ekonomika (bħall-assoċjazzjonijiet tan-negozju, ir-raggruppamenti industrijali, eċċ).
Tista’ taqra dwar xi eżempji ta’ kawżi dwar il-kompetizzjoni fl-UE fil-portal tad-DĠ Kompetizzjoni.
Kuntatti u ftehimiet illegali
Dawn il-ftehimiet huma magħrufin bħala kartelli. Huma pprojbiti minħabba li jirrestrinġu l-kompetizzjoni. Dawn jistgħu jieħdu bosta suriet, u m’hemmx għalfejn ikunu approvati uffiċjalment mill-kumpaniji involuti. L-aktar eżempji komuni ta’ dawn il-prattiki huma:
- L-iffissar tal-prezzijiet
- It-tqassim tas-suq
- Ftehim dwar l-allokazzjoni tal-konsumaturi
- Ftehim dwar il-limitazzjoni tal-produzzjoni
- Ftehimiet ta’ distribuzzjoni bejn il-fornituri u l-bejjiegħa fejn, pereżempju, il-prezz mitlub lill-konsumaturi jiġi impost mill-fornitur
Kull ftehim u skambju ta’ informazzjoni bejnek u bejn il-kompetituri tiegħek li jnaqqsu l-inċertezza strateġika tiegħek fis-suq (rigward l-ispejjeż tal-produzzjoni, il-fatturat, il-kapaċità, il-pjanijiet ta’ kummerċjalizzazzjoni tiegħek, eċċ.) jistgħu jitqiesu bħala antikompetittivi.
Twissija
Anki l-iżvelar ta’ informazzjoni strateġika ta’ dan it-tip b’mod unilaterali permezz tal-posta elettronika, tat-telefown, jew ta’ laqgħat jista’ jitqies bħala ksur ta’ din ir-regola.
Biex tkun fiż-żgur:
- Tiffissax prezzijiet jew kundizzjonijiet kummerċjali oħrajn
- Tillimitax il-produzzjoni
- Taqsamx is-swieq mal-kompetituri tiegħek
- Tiskambjax informazzjoni strateġika dwar il-kumpanija tiegħek
Hemm xi ftehimiet li mhumiex ipprojbiti - jekk ikunu jistgħu jiġu ġġustifikati għax minnhom igawdu l-konsumatur u l-ekonomija b’mod ġenerali. Eżempju ta’ dan huma ftehimiet dwar ir-riċerka u l-iżvilupp u dwar it-trasferiment tat-teknoloġija. Dawn il-każijiet huma koperti bir-Regolamenti dwar l-Eżenzjoni ta’ Kategorija.
Abbuż minn pożizzjoni dominanti
Jekk il-kumpanija tiegħek għandha sehem kbir fis-suq u għandha pożizzjoni dominanti, trid toqgħod attent li:
- ma titlobx prezzijiet għoljin bla ġustifikazzjoni, li jisfruttaw lill-konsumaturi
- ma titlobx prezzijiet irrealistikament baxxi li jistgħu jimbuttaw lill-kompetituri ’l barra mis-suq
- ma tiddiskriminax bejn il-konsumaturi
- ma tinfurzax ċerti kundizzjonijiet tal-kummerċ fuq in-negozji msieħba miegħek
Ir-rapportar ta’ mġiba antikompetittiva
Jekk tiltaqa’ ma’ prattiki ta’ negozju li jistgħu jirrestrinġu l-kompetizzjoni, tista’ tirrappurtahom.